સંતાનને ભૂલશો નહિ

ભૂલો  ભલે  બીજું  બધું  સંતાનને  ભૂલશો  નહિ,

અગણિત  છે ફરજો મારી  એને  વિસરશો  નહિ.

સંતાનને  ઘડવાની  આજ્ઞા  આપી તમને ઈશ્વરે,

સંતાનના ઘડતરમાં  ખામી કોઈ’દી રાખશો નહિ.

અવગુણ  તમારી  જિંદગીમાં કેટલાયે  હો   ભલે,

સંતાન આગળ અવગુણોને પ્રગટ કદી કરશો નહિ.

હો ભલે શિક્ષિત, અશિક્ષિત, અલ્પ શિક્ષિત પણ તમે,

સંતાનના  શિક્ષણ  મહીં  પાછા  કદી  પડશો  નહિ.

સ્વામી  હો  કે  ગૃહિણી હો ને  હો પરસ્પર પ્રેમ પણ,

સંતાન  આગળ  પ્રેમની  રેખા  કદી  વટશો   નહિ.

સંસ્કાર   સારા   જિંદગીમાં   હોય   સિંચાયેલ   તો,

સંસ્કારમાં   એ   સિંચવાનું   કદી   વિસરશો   નહિ.

જે   આપશો  તે  પામશો  જેવાં  હશો  તેવાં  થશે,

જેવાં ઘડો તેવાં ઘડાશે એ વાત કદી વિસરશો નહિ.

ગુણમાં  તમારાથી  સવાયા  નામ  એ  તમ  રાખશે,

ઘડપણ  મહીં  થાશે  સહારો  વાત  એ  ભૂલશો નહિ.

સંતાનનું  સુખ  સૌથી  મોટું   દુ:ખ  પણ  સંતાનથી,

શાંતિ   માટે   જીવનમાં   સંતાનને   ભૂલશો   નહિ.